इजिप्टको राजधानी कायरोको एउटा चर्चमा आइतबार बिहान प्रार्थनाको क्रममा आगलागी हुँदा १५ बालबालिकासहित कम्तीमा ४१ जनाको मृत्यु भएको छ भने कैयौँ घाइते भएका छन् । सहिद अबु सेफिन चर्चमा आगो लागेपछि कालो धुवाँ भित्र छिट्टै भरिएको र त्यहाँ अराजकता मच्चिएको प्रत्यक्षदर्शीले बताएका छन् । आगोबाट बच्ने प्रयासमा धेरैले माथिल्लो तलाबाट हाम फालेका थिए ।
अबु बिशोय नाम गरेका व्यक्तिले भने, ‘म निसास्सिरहेको थिएँ । सास फेर्न गाह्रो हुन थाल्यो । सबैको ज्यान गएको छ ।’ आगलागीमा परी चार प्रहरी सहित १६ जना घाइते भएका छन् । प्रहरीको विज्ञप्ति अनुसार इम्बाबाको सघन जनसंख्या भएको क्षेत्रमा रहेको अबु सेफिन चर्चमा आगलागी भएको हो ।
आगलागीको कारण तत्काल पत्ता नलागेको र प्रारम्भिक अनुसन्धानले सर्ट सर्किटका कारण आगलागी भएको विज्ञप्तिमा जनाइएको छ । कप्टिक चर्चले स्वास्थ्य अधिकारीहरूलाई उद्धृत गर्दै हताहतको रिपोर्ट गरेको छ । आगलागी हुँदा भवनभित्र धेरै बालबालिका रहेको प्रत्यक्षदर्शीले बताएका छन् ।
एक प्रत्यक्षदर्शीका अनुसार आगलागी हुँदा चर्च धुवाँले भरिएको थियो र फसेका धेरैले माथिल्लो तलाबाट हाम फालेका थिए भने धेरैको निसास्सिएर मृत्यु भएको थियो । आगो निभाउन १५ वटा दमकल घटनास्थलमा पुगेका थिए भने घाइतेहरूलाई एम्बुलेन्समार्फत नजिकैको अस्पतालमा लगिएको थियो ।
राष्ट्रपति अब्दुल फतेह अल-सिसीले कप्टिक क्रिश्चियन पोप तावड्रोस द्वितीयसँग फोनमा कुरा गरे र उनको शोक प्रकट गरे, राष्ट्रपति कार्यालयले जनाएको छ । अल-सिसीले फेसबुकमा भने, ‘म यो दुखद दुर्घटनामा नजर राखिरहेको छु । आवश्यक सबै कदम चाल्न सम्बन्धित निकाय र संस्थालाई आग्रह गरेको छु ।’
