अफगानिस्तानको काबुलस्थित रुसी दूतावास बाहिर सोमबार भएको विस्फोटमा २० जनाको मृत्यु भएको छ । मारिनेमा दुई जना रुसी कूटनीतिज्ञ थिए । रुसी सरकारी सञ्चारमाध्यम आरटीले अफगानिस्तानको स्थानीय सञ्चार माध्यमलाई उद्धृत गर्दै यो समाचार दिएको हो ।
एक वर्षभन्दा बढी समयअघि तालिबानले आफ्नो कब्जामा लिएपछि काबुलमा आफ्नो दूतावास कायम गर्ने केही देशमध्ये रुस पनि एक हो । यद्यपि मस्कोले तालिबान सरकारलाई आधिकारिक रूपमा मान्यता दिएको छैन, तर उनीहरूले पेट्रोल र अन्य वस्तुहरू आपूर्ति गर्न अधिकारीहरूसँग सम्झौता गरिरहेका छन् ।
समाचार एजेन्सी रोयटर्सको रिपोर्ट अनुसार अफगान प्रहरीले काबुलस्थित रुसी दूतावासको प्रवेशद्वार नजिकै आत्मघाती बम विस्फोट गराएको बताएको छ । दूतावासको सुरक्षामा खटिएका सशस्त्र गार्डहरूले आत्मघाती आक्रमणकारीलाई पहिल्यै पहिचान गरी गोली हानेको प्रहरीले जनाएको छ ।
तैपनि उनी दूतावासको गेट नजिकै पुग्न सफल भए । रुसी दूतावास रहेको इलाकाका प्रहरी प्रमुख मौलावी साबिरले रोयटर्सलाई भने कि आत्मघाती आक्रमणकारीलाई रुसी दूतावासको सुरक्षामा खटिएका तालिबान गार्डहरूले गेटमा पुग्नुअघि नै पहिचान गरी गोली हानेको बताए ।
