अमेरिकामा फेरि एकपटक अन्धाधुन्ध गोली चलेको छ । दुर्घटनामा दुई जनाको मृत्यु भएको छ भने तीन जना घाइते भएका छन् । दक्षिणी क्यालिफोर्नियामा रहेको ‘७-इलेभेन’ चेनका चार पसलमा सोमबार बिहानै गोली हानाहान भएको थियो । अधिकारीका अनुसार गोलीबारीका चारमध्ये तीन घटनामा एउटै व्यक्तिको संलग्नता रहेको अनुमान गरिएको छ ।
गोलीबारीको पहिलो घटना नदीको किनारमा भएको थियो, त्यसपछि 39 किलोमिटर टाढा सान्ता आनामा गोलीबारी भएको थियो । प्रहरीका अनुसार सोमबार बिहान सान्ता आनाको ७-इलेभेन स्टोरमा गोली चलाउने व्यक्तिले नै गोली चलाएको अनुसन्धानकर्ताहरूले विश्वास गरेका छन् ।
यो महिनाको ४ जुलाईमा अमेरिकाको शिकागोमा स्वतन्त्रता दिवस परेडमा अन्धाधुन्ध गोली चल्दा ६ जनाको मृत्यु भएको थियो भने २४ जना घाइते भएका थिए । शिकागोको हाइल्याण्ड पार्क क्षेत्रमा स्वतन्त्रता दिवसको परेडका क्रममा गोली चलेको थियो । गोलीबारीपछि शिकागोको हाईल्याण्ड क्षेत्रमा अराजकता मच्चिएको थियो ।
