दक्षिण अफ्रिकाको तटीय सहर पूर्वी लन्डनको एक नाइटक्लबमा आइतबार बिहान कम्तीमा २० जना युवा मृत फेला परेका छन् । युवाको मृत्यु के कारणले भएको हो भन्ने खुल्न सकेको छैन । प्रहरीले यस विषयमा अनुसन्धान गरिरहेको छ । यी युवाहरु विद्यालयको परीक्षा सकिएको खुसीयाली मनाउन पार्टीमा सहभागी भएका थिए । स्थानीय प्रहरी अधिकारीले भने कि हामीले २० जनाको मृत्यु भएको जानकारी पाएका छौं ।
ती सबै पूर्वी लन्डनको सिनरी पार्कको स्थानीय क्लबमा मारिएका युवाहरू हुन् । हामी अझै घटनाको वरिपरि परिस्थितिहरूको अनुसन्धान गरिरहेका छौं । स्वास्थ्य विभागका प्रवक्ता सियान्दा मनानाले मृत्युको कारण पुष्टि गर्न बाँकी रहेको बताए । मनानाको अनुसार ‘मृत्युको सम्भावित कारण पत्ता लगाउन शवको पोस्टमार्टम भइरहेको छ,’ ।
स्थानीय पत्रिका ‘डेली डिस्प्याच’ ले शवहरू टेबुल र कुर्सीहरूमा सुतिरहेको र चोटपटकको कुनै लक्षण नदेखिएको जनाएको छ । मृतक सबैको उमेर १८ देखि २० वर्षको बीचमा रहेको छ । घटनास्थलका तस्बिरहरू सामाजिक सञ्जालमा भाइरल भइरहेका छन् जसमा क्लबमा मृतकको शरीरमा कुनै घाउ वा चोटको निशान नरहेको स्पष्ट देख्न सकिन्छ ।
क्लबका मालिक सियाखांगेला एनदेवुले स्थानीय प्रसारक (ENCA) लाई आइतबार बिहान घटनास्थलमा बोलाइएको बताए । नादेवुले भने, ‘के भयो मलाई अझै थाहा छैन’ ।
