ताइवानमा आज बिहान शक्तिशाली भूकम्प आएको थियो । भूकम्पको प्रभावका कारण धेरै भवनहरू झुकेका छन् । ताइवानको केन्द्रीय मौसम विज्ञान प्रशासनले बुधबार बिहान ताइवानको राजधानी ताइपेईमा शक्तिशाली भूकम्प महसुस भएको जनाएको छ ।
भूकम्पपछि जापानको मौसम विज्ञान एजेन्सीले सुनामीको चेतावनी जारी गरेको छ । जापानले आफ्नो दक्षिणी दुई टापुमा पहिलो सुनामी आएको बताएको छ । जापानले दक्षिणी टापु ओकिनावाका लागि सुनामीको चेतावनी जारी गरेको छ ।
रिक्टर स्केलमा ७.२ म्याग्निच्युडको भूकम्प गएको थियो । ताइवानमा भूकम्प यति शक्तिशाली थियो कि साङ्घाईसम्म कम्पन महसुस गरिएको थियो । फुझोउ, जियामेन, झुआनझोउ र निङडेमा पनि भूकम्पको झटका महसुस गरिएको चिनियाँ मिडियाले जनाएको छ ।
ताइवानको पूर्वी तटमा ७.२ म्याग्निच्युडको भूकम्प आएपछि एक जनाको मृत्यु भएको र ५० जनाभन्दा बढी घाइते भएको ताइवानको अग्निशमन विभागले जनाएको छ ।
भूकम्पका कारण ताइवानमा भवनहरू ध्वस्त भएका छन् । ध्वस्त भवनको भग्नावशेषमा मानिसहरू फसेका छन् । भूकम्पको केन्द्र नजिक रहेको ताइवानको पूर्वी तटमा रहेको हुआलिएन सहरमा क्षति भएको बताइएको छ । अमेरिकी भूगर्भीय सर्वेक्षणका अनुसार भूकम्पको केन्द्र ह्वालिएन सहरबाट करिब १८ किलोमिटर दक्षिणमा रहेको थियो ।
