नेभा, काठमाडौं, ११ फागुन,

फागुन १० गते सुराकीले दिएको विशेष सुराकीको आधारमा IndiGo एयरलाईन्सको उडानद्वारा दुबईबाट मुम्बई हुँदै काठमाण्डौ आगमन भएका फ्लाईटबाट एकजना भारतीय नागरिकलाई पक्राउ गरिएको छ ।

पक्राउ पर्ने ३५ वर्षको MOHAMMAD ZEESHAN भन्ने व्यक्ति हुन् । त्रिभुवन अन्तर्राष्ट्रिय विमानस्थलको आगमन एरियाबाट नियन्त्रणमा लिईएको छ ।

चेकजाँच गर्दा निजले लगाई आएको निलो रंगको जिन्स पाईन्ट, कालो रंगको गन्जी र खरानी रंगको भित्री वस्‍त्र (Underwear) मा सुन जस्तो देखिने पंहेलो रंगको लेपन (Paste) गरिएको एवं उक्त कपडाहरुको तौल गर्दा अन्दाजी २२१० ग्राम तौल थियो ।

निजलाई उक्त लुगाहरु सहित नियन्त्रणमा लिई आवश्यक कानूनी कारबाहीको लागि त्रिभुवन विमानस्थल भन्सार कार्यालय, गौचरमा बुझाइएको कुरा त्रिभुवन अन्तर्राष्ट्रिय विमानस्थल, सुरक्षा प्रहरी कार्यालयले जनाएको छ ।