श्रीलंकामा अहिलेसम्मकै सबैभन्दा खराब आर्थिक संकटको बीचमा देशका प्रधानमन्त्री महिन्दा राजापाक्षेले सोमबार आफ्नो पदबाट राजीनामाको घोषणा गरेका छन् । महिन्दाको राजिनामा देशको कमजोर अर्थतन्त्रलाई लिएर प्रधानमन्त्रीको राजिनामाको लागि व्यापक विरोध र सार्वजनिक मागको बीचमा आएको हो । प्रदर्शनकारीहरूले महिन्दाका भाइ गोटाबाया राजापाक्षेलाई श्रीलंकाको वर्तमान संकटलाई लिएर राष्ट्रपति पदबाट राजीनामा दिन पनि माग गरिरहेका छन् ।
यसअघिका समाचारमा राष्ट्रपतिले प्रधानमन्त्रीलाई राजीनामा दिन आग्रह गरेको दाबी गरिएको थियो । प्रधानमन्त्री महिन्दाले यी रिपोर्टहरूको खण्डन गर्दै यस्तो कुनै अनुरोध नगरिएको र आफूले राजीनामा नदिने बताए । तर, सत्तारुढ श्रीलङ्का पोदुजाना पेरामुना पार्टी (एसएलपीपी) र यसका गठबन्धनबीच भएको धेरै बैठकपछि प्रधानमन्त्री महिन्दा राजापाक्षेले आफ्नो पदबाट राजीनामा दिने निर्णय गरेका छन् ।
श्रीलंकाका अधिकारीहरूले सोमबार राष्ट्रव्यापी कर्फ्यू लगाएका छन् । यसैबीच, राष्ट्रपति गोटाबाया राजापाक्षेको कार्यालयबाहिर सरकार समर्थक समूहले प्रदर्शनकारीमाथि आक्रमण गरेपछि राजधानी कोलम्बोमा सेना परिचालन गरिएको छ । यस आक्रमणमा कम्तीमा २३ जना घाइते भएका छन् । प्रहरी प्रवक्तालाई उद्धृत गर्दै स्थानीय सञ्चारमाध्यमले भनेका छन् कि श्रीलंकामा अर्को सूचना नआएसम्म तत्काल प्रभावका साथ कर्फ्यू लगाइएको छ ।
शान्ति सुरक्षा कायम गर्न सेनाको टोली आन्दोलन स्थलमा तैनाथ गरिएको छ । शुक्रबारको मन्त्रिपरिषद्को विशेष बैठकमा राष्ट्रपति राजापाक्षेले शुक्रबार मध्यरातबाट संकटकालको घोषणा गरेका हुन् ।
