२०८३ भदौ ८, काठमाडौं,
लागूऔषध नियन्त्रण ब्यूरो, कोटेश्वरले काठमाडौं उपत्यकाका विभिन्न स्थानबाट लागूऔषध खैरो हेरोइन १४८.९५० ग्रामसहित चार जनालाई पक्राउ गरेको छ। उनीहरूको साथबाट डिजिटल तराजु र नेपाली नगद ९० हजार रुपैयाँ समेत बरामद भएको ब्यूरोले जनाएको छ।
भारतसँग सीमा जोडिएका तराईका जिल्लाबाट खैरो हेरोइन खरिद गरी काठमाडौं उपत्यकामा बिक्री तथा वितरण गर्ने व्यक्तिहरूको प्रोफाइलिङ गर्ने क्रममा ब्यूरोले भदौ ४ देखि ६ गतेसम्म विभिन्न स्थानमा कारबाही गरेको थियो। सो क्रममा भदौ ४ गते सिरहा नगरपालिका–१४ का २७ वर्षीय रितेश कुमार यादव र मिर्चैया नगरपालिका–३ का २२ वर्षीय अभिषेक यादवलाई ३७ ग्राम हेरोइनसहित पक्राउ गरिएको थियो। त्यस्तै, भदौ ५ गते मोरङको बेलबारी नगरपालिका–१० का २३ वर्षीय मनोज बस्नेतलाई १३.९५० ग्राम हेरोइनसहित नियन्त्रणमा लिइएको थियो।
यसैगरी, भदौ ६ गते संखुवासभा ठेगाना भएका १७ वर्षीय एक बालकलाई ९८ ग्राम हेरोइनसहित पक्राउ गरिएको ब्यूरोले जनाएको छ। कानुनी प्रावधानका कारण उनको नाम सार्वजनिक गरिएको छैन। पक्राउ परेका बालकलाई बालबालिकासम्बन्धी ऐन, २०७५ बमोजिम भक्तपुरस्थित बाल अदालतको निगरानी कक्षमा राखिएको छ।
ब्यूरोका अनुसार पक्राउ परेका चारै जनामाथि लागूऔषधसम्बन्धी कसुरमा थप अनुसन्धान भइरहेको छ। बरामद भएको लागूऔषध, डिजिटल तराजु र नगद रकमसमेत अनुसन्धानका क्रममा प्रमाणका रूपमा राखिएको छ।
