सोमबार इन्डोनेसियाको मुख्य टापु जाभामा गएको शक्तिशाली भूकम्प र पराकम्पनका कारण धेरै घरहरु ध्वस्त भएका छन् । भूकम्पका कारण मुलुकमा हालसम्म १६२ जनाको मृत्यु भइसकेको छ भने सयौं घाइते भएका छन् । भूकम्पका कारण दर्जनौं भवनमा क्षति पुगेको छ । सडक र गल्लीहरूमा ज्यान जोगाउन दौडिरहेका धेरै मानिसहरू घाइते र रगतले लतपतिएको देखियो । ५.४ म्याग्निच्युडको भूकम्प पश्चिम जाभा प्रान्तको सियानजुर क्षेत्रमा १० किलोमिटर गहिराइमा गएको थियो ।
देशका दुर्गम क्षेत्रमा भूकम्पमा परी ज्यान गुमाउनेको सङ्ख्याबारे अधिकारीहरूले अझै जानकारी सङ्कलन गरिरहेका छन् । जाभाका गभर्नर रिद्वान कामिलले मृत्यु हुनेको संख्या १६२ पुगेको बताए । “मृतकमा अधिकांश बालबालिका छन्,” उनले भने । भूकम्पका बेला सामुदायिक विद्यालयमा अध्ययनरत अधिकांश बालबालिकाले पढाइ सकेर इस्लामिक विद्यालयमा तालिम लिइरहेको उनले बताए । सियानजुरमा सबैभन्दा धेरै इस्लामिक आवासीय विद्यालय र मस्जिदहरू छन् । कामिलले भने, “धेरै इस्लामिक विद्यालयहरूमा घटनाहरू भएका छन् ।”
इन्डोनेसियाको मौसम विज्ञान तथा मौसम भूभौतिकीय एजेन्सीका अनुसार भूकम्पपछि थप २५ वटा पराकम्पन गएको छ । “भूकम्प धेरै शक्तिशाली थियो र म बेहोस भएँ । मैले मेरा सहकर्मीहरू भवनबाट बाहिर निस्केको देखें, तर म भाग्न र पर्खालमा ठोक्न धेरै ढिलो भएँ,” सियानजुर क्षेत्रीय अस्पतालमा उपचाररत कामदार हसनले भने । सियानजुरमा उद्धार टोलीका सदस्यबाहेक स्थानीय बासिन्दाले पनि राहत र उद्धार कार्यमा सहयोग गरेको देखिएको छ । भत्किएका भवनको ठक्करबाट सयौं मानिस घाइते भएका छन् ।
